LÍTIL NÝGGJÁRSRØÐA

Royni einki at siga. Eg eri hvørki ella røvari. Men eg havi skil fyri sterti og sigi so lítið sum einki.

Sum maðurin - ella var tað konan? Best er at halda kjaft. Ella munn.

Nýggjársrøða um hvat? Veðurlag sigur tú. Kanst tú liva av tí? So nógv av luft havi eg ikki í mær

at eg kann ávirka veðrið.

Eg eri føroyingur og í Føroyum skínur sólin altíð. Várharrasa sól. Tað broytist ikki og vit fiska ikki

plastikk

og reiðararnir leggja einki í pengar. Og teir ganga allir trúliga í Baptesta og har er Mammon ikki

kapitalistur men kommunistur. Men Jesus elskar kapitalistarnar meir enn øll onnur, tí einki skal vera

teimum givið, men tikið, so teir kunnu taka tað aftur saman við keisaranum sum elskar alt sum kann

eigast so hann kann fáa sítt og sítt og sítt. Og ikki minst: títt. Og vit eru hvørki

kommunistar ella kapitalistar men baptestistar og mammonistar. Tað er

ikki rætt at vit baptestatistar trúgva á pengar, nei, vit

trúgva á fleskasteikir og fáreiðaraveldi við veikari snorbremsu. Nei pengar leggja vit einki í. Hvat

skulu vit brúka teir til, ha? Okkum nýtast ikki pengar til at býta fish & chips til hvønn Hanus & Hanus

 ha? Stálið fáa vit eisini fyri einki frá vára útlendsku brøðrum. Vit egna heldur ikki við pengum,

vit egna við fleskasteikum og við egnum fisk & chipsi so mann

 merkir sveittan frá einum sum aldin hevur verið í bað. Tað er sakin. Fólkaflokssakin. Tann

pengaleysa sakin.

Og hvat rakar tað ongan?

Tað rakar heldur ongan at vit hava keypt fólkafloksins

consiglieri Chr. "Tom Hagen" Andreasen. Fyri pengar? Ha? Sig mær, hugsa tit bara um pengar?

Sjálvandi fær hann nógv aftur fyri at skaffa okkum fólksins øh okkara ogn. Hvat tá? Vit eru jú Mammons

øh Guds útvaldu reiðarar sum eru valdir at stýra fólkið beina leið í bank øh Baptesta at angra sínar syndir

tá tey hava valt hinar flokkarnar og ikki givið okkum pengarnar og havsins virðir sum vit sum Guds og

Baptestasa og Erdogan Vestergaards  og Guds og Mamm øh øh íslendingar øh hálendingar øh útvalda

fólk jú eiga.



Gott nýggjár øll tit vælhavandi og rætttrúgvandi.

Gamlaársmorgun 2019

Bróðir Brilluball

HVØR EIGUR HVAT

:

DAGAR Í VIKU

Her er óvanliga heitt um veturin, segði tann mismælti við tann masmilta, sum svaraði, at so mugu tit lata tykkum væl í.


                                Leygardagur

                             

                               Fríggjadagur

                             

                               Hósdagur

                             

                                Mikudagur

                             

                               Týsdagur

                             

                               Mánadagur

                             

                               Sunnudagur

                             

                                Dagurin ímillum sunnu- og mánadag

                             

                               Gerandismorgun

                             

                               Sunnumorgun

                             

                               Tostamannatrø

                                                                               *

R O C A I L L E S

                                    búrið óttast fuglin
                              hann er ov stórt eitt hjarta
                                     skatturin í himni
                               stoytir renturnar frá sær
                                  náðin svølgir eldin
                              falski vitnisburðurin festi
                                 við lítla sannleikanum
                                   ein blásvørt dúgva
                                      vitjaði málaran
                                   ljósins bleiki trælur
                             vil so fegin fanga mjørkan
                              við einum pensli av grasi
                                 og ger vínið til breyð
                                  og sorgina til steinar
                       sum rotna tá tú gongur á teimum
                            eingin skal oyðileggja tað
                        sum longu er oyðilagt í verðini
                         eingin livir av at vera tekning
                         ella doyr av at vera málningur

                                           je me reflète
                                        dans cette pierre
                                    que dieu m´a donnée
                      un matin dans une nuit très ancienne
                                              lorsque
                                        définitivement
                                   il décida de ne plus
                                              avaler
                                      l´amour tout cru












                                                    *

MÓTI

                                                 hon gekk altíð
                                                 í skræpugulum
                                                 buksum

                                                 mamman gekk
                                                 í skræpureyðum
                                                 og pápin
                                                 í skræpugrønum

                                                 omman
                                                 var farin
                                                 foldum frá
                                                 men henni dámdi best
                                                 at ganga í
                                                 skræpubláum buksum

                                                 og abbin
                                                 hann gekk í øðrum heimi
                                                 og vísti
                                                 síni skræpubleiku bein



                                                               *

                                                                                             *

VIÐHVØRT

                                viðhvørt so veit eg ikki hví
                                     men tað er einki nýtt
                                         at fuglurin doyr
                                       í sínum bestu árum
                                       spyr bara ketturnar
                              geislingarnar frá telefonunum
                                        og flogkyktseitrið
                                         tó skuldi hetta
                                   snúgva seg um ein stól
                           sum tú bæði kann sita og liggja á
                                           og drekka av
                                             samstundis
                                       uttan at tú letur teg
                                      órógva av miðlunum
                                        og eg veit ikki hví
                                             at viðhvørt
                                                er altíð






.

EIN DAGUR OG ANNAR

Tað eru átjan ár og nakrir dagar síðani hesa hending og eg orki ikki at lesa fleiri konpiratiónsteoriir um hana. Men at Føroyar hava fingið ein talibanskan mentamálaráðharra er tíverri ikki ein konspiratiónsteori.

                                                                           +

TAÐ VINARLIGA SPØKILSIÐ

                    

                    syndarligt at síggja
                    sum hann týsnaði upp
                    daniel johnston
                    av øllum heiliváginum
                    hann varð fyltur við
                    vegna skizofrenu og 
                    bipolaru líðing sína
                    og hann skalv sum
                    eitt bókablað meðan 
                    hann sang sínar
                    kátu sangir og tú
                    gjørdist sjálvur í
                    góðum lag ikki minst 
                    tí hansara kasettubond
                    góvu pláss til øll
                    lívsins óljóð og alt
                    tað hann sá og hoyrdi
                    í sínum høvdi
                    ikki minst casper 
                    the friendly ghost
                    sum hann sá fyri sær
                    tá hann og pápin
                    flugu heim frá eini
                    tónleikastevnu 
                    í privatflogfari
                    við pápanum sum
                    flogskipara (tað
                    var eisini starv
                    hansara) og daniel
                    tók lykilin og tveitti
                    hann úr flúgvaranum
                    og motorurin steðgaði
                    so pápin noyddi at 
                    neyðlenda og flúgvarin
                    brotnaði men ikki
                    teir síðani
                    varð hann innlagdur
                    aftur og aftur 
                    á sálarsjúkrahúsi men
                    helt áfram við at skriva
                    sín avantgardiska popp
                    og tekna sínar fabulerandi tekningar
                    og hann vildi ikki skriva plátusáttmála 
                    við hvønn sum helst til dømis
                    electra tí teir góvu metallica út
                    og daniel var sannførdur um at teir
                    vóru satanistar ha ha ha
                    tað kundi eisini verið
                    ein sangur men hjartað er nú steðgað
                    sum øll hjørtur gera
                    fyrr ella seinni
                    og nú flýgur hann á hægri luftløgum
                    saman við kaspari tí vinarliga
                    spøkilsinum og teir syngja 
                    og spæla saman við cobain
                    og bowie sum elskaðu hann
                    og helvtina av the beatles
                    sum hann elskaði
                    og teir spæla inn
                    á kasettubond 
                    sum santkta pætur við lyklinum 
                    syrgdi fyri
                    vóru klár til hann
                    saman við bandupptakaranum
                    sum er úr reinum anda
                    eins og hann sjálvur




                              *

               

HÓS

her kundi okkurt staðið sum ikki hevur staðið her fyrr men vegna álítandi keldur verður tað av ongum og veðurlíkindini verða ikki sum ætlað eftir sum sólin ikki hevur hug til at hugna sær í oysandi regni og óálítandi vindi sum bítur seg sjálvan í halan tá á stendur at síggja mun á kundum og hornum í tí stóra sjálvtøkuhandlinum onkustaðni mitt í millum himmal og helviti har eingin hevur ráð til nakað fyrr enn svarta fríggjadag tann trettanda tá øll skapan verður seld á útsølu til tann talibanska kommunulæknan sum skal endurføða alt sum deyða meðan hann dansar tungutalandi undir fullmánanum

-

VALTVØST

Vit í Histalistaflokkinum fara at arbeiða fyri ókeypis viskileðri og timburblýantum til rithøvundar. Farvuladan sum myndlistafólk brúka skal trekkjast frá í skatti, um verkini, farvuladan er brúkt til, samsvara politikki Listahistafloksins. Arbeitt verður eisini fram ímóti, at listafólk sjálv kunnu keypa síni verk og trekkja fjórðingin av í skatti. Ljóðføri sum ikki larma meir enn 5 dcb skulu kunnu keypast fyri 4% í avsláttri um viðkomandi tónleikari er limur í Histalistaflokkinum. Vit vilja eisini arbeiða fyri at Sjónleikarhúsið verður málað grønt og Tjóðleikhúsið verður bygt av ókeypis arbeiðskraft undir parkeringsplássunum á Skálatrøð. Histalistaflokkurin vil eisini arbeiða fyri, at Listasavn Føroya skal hava tveir -og ikki bara ein - danskar stjórar. Teir skulu vera serfrøðingar í ávikavíst italienskari renesansu og í danskari gullaldarlist. Tá kunnu føroysk yrkislistafólk detta ímillum báðar stólarnar, og júst tá tey langa høvdið í, kemur nettupp tann íblásturin í tey, sum kann gera tey til sjálvhjálpin og rík listafólk sum ikki nýtast stuðul. * Soleiðis koma yrkislistafólk at klára seg betri og nýtast ikki at hugsa um annað enn, at tey skulu atkvøða fyri Histalistaflokkinum. Men sleppa vit ikki inn á ting, verður skilið tað sama sum við hinum flokkunum sum sleppa inn á ting.

*Her kunnu vit eisini leggja aftrat, at tá listafólkini aftaná ein slíkan danskan tvístjóraskelk vakna, ja so rokna vit eisini við, at hesir báðir stjórarnir sjálvir eisini vakna og fara eisini at selja caramel við kokos, og ikki sum nú við ongum kokos. So kunnu vit fyrigeva teimum, at teir einki vita ella leggja í føroyska samtíðarlist. Og velja listafólk Histalistaflokkin, verður trygd latin fyri, at tey fáa minst 5% avsláttur upp á bæði caramellini. Tó hægst eitt um mánaðin.

Síðani hetta varð lagt út, hevur Histalistaflokkurin verið saman og umrøtt alternativar møgleikar at fáa pengar úr listini. Ein møguleiki er, at seta hegn og píkatráðsgirðingar við gjaldsportri rundan um allar standmyndir sum standa og liggja um landið alt. Peningurin sum inn kemur skal koyrast í ein standmyndagrunn sum kann stuðla undir nýggjum høvuðbrýggi í høvuðbrýggjabólki Histalistafloksins í teirra arbeiði at menna nýggj hugskot sum kunnu hjálpa listini at klára seg sjálv.

STANDMYND

                                       *

SANNFØRINGUR

*

H. H.

LÆTTIMJÓLKARÁÐ

                                                     

                                                      tað er at fregnast um
                                                      at okkurt kemur aftrat
                                                      til dømis mjólkin
                                                      hjá fíggjarmálaráðnum
                                                      sum bara tók tveir pakkar inn
                                                      góðar tíðir líkasum
                                                      og so kunnu turistarnir
                                                      við ella uttan fototól
                                                      fáa sær ein mjólksopa

                                       

                                               ( ella var lættimjólkin barasta ov løtt? )










.

GOMUL TELEFON

                 gomul telefon
                 kennir ikki
                 hesar ungu
                 røddir

                 biður meg
                 taka hornið 
                 av sær


















.

TAÐ TORNAÐA PORTRIÐ

                                         Eitt petti av turrari grind íblásti hetta verkið
                                         og so hugsaði eg eisini um eitt gamalt hagaportur.
                                         Nakað heiti legði eg einki í at geva myndini.
                                         Og eitt portur er eisini ein grind.





**

GESTUR

Meðan eg lá og las á svørtusofu pikkaði onkur á vindeygað. Tað var hasin har, ið eg var skjótur at myndtaka. Tá eg nærkaðist vindeyganum, fór hann á flog, so eg fekk ikki at vita, hvat hann vildi mær, ella hvørjum slagi hann er av og hvat hann eitur. Kanska onkur bloggoddalesari veit?

*

VIKA

                                               hvussu nógv
                                               skulu standa
                                               her

                                               hvussu nógv
                                               orð eru orð
                                               í einari viku

                                               hvussu nógv
                                               orð eru í
                                               einari viku

                                               hvussu nógv
                                               orð er
                                               ein vika

                                               hvussu nógv
                                               orð eru í
                                               mínari viku

                                               hvussu nógvar
                                               vikur skulu
                                               standa her

                                               hvussu nógv
                                               stendur her
                                               í eina viku









                         *

YNGRI ENN NÚ

 

:

LEIÐIR

                                                      tað kann sigast so nógv
                                                      um allar leiðir tú ferðast
                                                      krókarnir eru nógvir
                                                      og ferðin er lítil
                                                      tá hvør litur
                                                      skal sinnisklúgvast
                                                      og sjónin
                                                      verður sjálv
                                                      olja og luktir
                                                      sum so við
                                                      og við verða angi
                                                      undir gráum lofti

:

ÚR ERVA

                    
                                ÚR ERVA SÁ HANN ALT TAÐ HANN SKULDI SIGNA






.

EDUTILOS

                                                                              

                                                                                eingin
                                                                           er einsamari
                                                                             enn orðið
                                                                               einsemi

                                                                           tá orðið
                                                                            finnur
                                                                          eitt annað
                                                                               orð
                                                                          verður tað
                                                                           tvífalt so
                                                                          einsamalt
                                                                            tí tá er
                                                                           yrkingin
                                                                             á veg



.

KNØRR

                                                        Føroyar Føroyar tú ert so harðlig
                                                   við hjartanum fullum av køldum sparli
                                                 og fjøldin hon verður so grúuliga skjarrlig
                                                  tá hon rópar eftir hjálp frá sjálvum Carli
                                                       sum biður øll at vera meiri varlig
                                                  og hanga aftur úr onkrum øðrum darli

*

VISTFRØÐI

                          áh

                          ástarinnar mostir

                          tú sum gav mær plástur

                          á sárið

                          tað árið

                          vit lógu á skítuvík

                          og skitu

                          áh tann hiti

                          tann hiti

                          tá vit sóu eina ritu

                          og eitt blunk úr tínum viti

                          tá vit sótu og litu

                          á ástarinnar stóru lortar

                          ið paraðust við ternumurtar

                          so smáar

                          so smáar

                          at eingin gáar

                          eftir

                          at hetta eru

                          framtíðarinnar knettir

                          sum onnur eina ferð

                          fara at kukka í pettir

                          so smá

                          so smá

                          at eingin

                          fær tey at sjá

.