VIT

Vit skilja einki tí vit lukta so illa av vitloysi.










.

N!CHST

vaskimaskinan og
tann innari
plátuspælarin
snurra ikki
altíð í
felag

men í felag
snurra tey
væl
í hvør
sínum 
lagi






.

ER

Øðrvísi er ein onnur ætlan enn hon vit halda okkum vera fødd til at halda okkum til.















"

Á

Tað er ikki satt fyrr enn tú hevur sæð tað sum ein plett á vegginum.












.

ALLAN

Allan dagin bardist hann við támið og vann aðru hvørja ferð.













=

EIN

Ein veggur var báðumegin mjørkan.










'

ER

Eingin er at siga at einki er at siga.










`

HAR

Har var altíð onkur sum einki vildi siga meðan onnur hoyrdu.












´

B

Ein bilur eltir ein bil sum eltir ein annan bil og so er filmurin liðugur.







.

NÁTTÚRUMYND

hann hevur ilt
í løriftinum
fær leyst lív
so orðini
koma úr honum
sum grøn spýggja
men so sær hann
at hann kann
brúka tey sum máling
so løriftið
ikki sæst meir
hóast okkurt lítið kroyst hoyrist
og eitt sindur av luft
sleppur út gjøgnum skjótt stadnaðu skorpuna
myndin skal eisini liva
eftir at hon er deyð
og tá koma orðini
av sær sjálvum







¨