STUTTLIGIR DAGAR

kanska eru tit for alvorlig
har suðuri í havn
tit hugsa for nógv 
hugsa for djúpt líkasum
hví lata tit ikki bara vera við at hugsa?

blívið heldur sum klaxingar
teir eru altíð glaðir
skipa fyri summarfestivalum
við øllum møguligum avdankaðum popparum
skít veri við dygdini
bara teir hava verið kendir í nakrar dagar 
so eru klaxingar sannførdir um 
at tað man vera gott
og so frøast teir 
sum smábørn um jólamannin

teir eru altíð glaðir
klaxingar
og so hava teir sjómannadag
og fara í vatnkríggj
og eru akkurát líka glaðir
um teir blíva dýggj ígjøgnum ella ikki
og gleðirómurin er so smittandi
at sjálvt borgarstjórin í Runavík
hevur keypt sær eina vatnpistól
at skjóta seg sjálvan við 
um tað skuldi hent at hann fekk gron
og hann ætlar eisini at hansara kommunubørn
skulu spæla slík stuttlig spøl

og er tað so løgið at teir altíð eru glaðir
klaxingar
tá teir eisini sleppa
ein koyritúr gjøgnum býin við brandbilinum
jamen er nakað størri
enn at fara babuandi gjøgnum Klaxsvíkar bý?

og teir egna um kapp
og leggja ein lort í
um teir verða húðaleysir
bara teir eru glaðir
ikki minst 
tá teir royna at gerast klaxvíkarmeistarar
í at eta fish & chips frá JFK
tí oytt kunnu vit siga tykkum
at eingin í havn klárar
hvørki at egna ella eta
so nógv sum vit norðri í klax
og eingin er glaðari enn vit

og tá fær øll henda váta gleðin 
eisini fjøllini rundanum at læa
og at ynskja at kontórshavnarar ein dag
fara at oysa caffe latte hvør eftir øðrum
so teir eisini blíva glaðir
og fara rennandi gjøgnum býin
rópandi babu babu babu
babu babu babu babu




.

FYRR ELLA SEINNI

Fyrr ella seinni nýtist bara at siga, at vit gleðast um regnið, frøast.

Í MORGIN

Og í morgin er einki annað at siga, enn at tað verður heitari, lýggjari.

Í DAG

Tað er einki annað at siga, enn at tað er heitt í dag, lýtt.

EITT LÍTIÐ SINDUR UM RÍM

Sá ein frosk í gjárkvøldið. Ein stóran frosk. Hann gekk millum skrellistativini. Helt fyrst, at tað var ein rotta. Tað var myrkt, so eg fór eitt sindur nærri at hyggja, og tá sá eg, at tað var ikki ein rotta, men ein froskur. Og hugsaði, at froskur rímar við toskur. Og um eg kyssi ein tosk, verður hann so ein prinsessa?










,

JUBILSØKA

hvat skal eg her
eg eri ikki á nakrari festival
ella á onkrari fest
sum tað nú eitur
var veitsla heldur ikki eitt gott orð
ella stevna ella søka ella jubil
jubil hevði verið tað besta orðið at nevnt alt hetta
sum verður nevnt um alt møguligt annað enn tað tað er
jubil er eitt minst líka gott orð sum øll hini
og jubilidiotur er tvífalt so gott
tá mann kortini bara skal drekka øl úr plastbikørum
og lurta eftir bygdasligum tónleiki
sum var populerur í trý sekund
eina ferð langt síðani í farnu øld
tá tey ikki tóku myndir av sær sjálvum
og sendu tey sum telefontelegram til onkran nýfermdan
kúll ella kúllindu sum ikki høvdu hoyrt um róarkeldufagnaðin
ella g! ella summarfestivalin fyri óegndar stampar
sum ongantíð fingu húkin fastan í búkin á teirri røttu hitparaduni
ið altíð er tann doyggjandi sjúklingurin
sum bara vil vera í frið at vera tað
so leingi hann fær pengar afturfyri

COLD TURKEY

Havi lagt av at skriva. Næstan. Abstinensurnar eru tó so ringar, at eg má bara skriva eitt lítið sindur, so eg ikki drukni í sveitta. Tað hjálpir longu, men eg haldi, at eg gevist, áðrenn eg aftur blívi alt ov bundin av skrivingini. Eg havi fingið tveir nýggjar sveittaabsorberandi koddar. Annars veit eg einki.