søndag den 28. april 2013

GILJUTINUFLAGGIÐ

Her er ikki nógv av nýggjum. Kenni meg so avbloggaðan. Eg ætlaði at skriva eina flaggrøðu flaggdagin, men eg tímdi kortini ikki. Haldi fløgg eru so keðilig. Serliga tey norðurlendsku sum altíð skulu hava hatta torturinstrumentið við. Krossin. Trúgvi ikki at Jesus hevði dámt, at krossurin skuldi symboliserað hansara áskoðan. Høvdu rómverjar uppfunnið giljutinuna (fyrstu ferð eg havi stavað hana á føroyskum og í hesum føri sigur gi ikki dji) so hevði Jesus verið giljutineraður og so høvdu allar altartalvur í øllum kirkjum avmyndað ein giljutineran Kristus og eini flættaðari kurv við hansara høvdi í. Og vit høvdu sæð blóðsprænin úr hálsi hansara. Okkara merkiliga Merki hevði avmyndað eina bláa giljutinu, ein reyðan Kristus og eina hvíta kurv. Nei, eg má heldur royna sjálvur at tekna eitt uppskot til eitt giljutinuflagg, sjálvt um eg ikki eri úr Fámjin og havi gingið á Garði. Havi ongantíð verið har inni, men mangan gingið framvið. Kanska fer mítt giljutinuflagg at hanga í Havnar kirkju og ein nýggjur Hans Andrias fer at gera ein upp aftur nýggjari flaggsang. Sjá tú bliknar sum kurvin osfr.
Nei nú eri farin av sporinum. rómverjar uppfunnu ikki giljutinuna, men ein franskur lækni við sama navni, stavað á fronskum. Á døgum Nólsoyar Páls. Og tað var vist av humanum grundum. Skarprættarar høvdu tað við at raka við síðuna av. Helst tí at teir høvdu drukkið nakað nógv av móti til áðrenn. Men krossurin er meiri sadistiskur, tað tekur sína tíð at doyggja. Rómverjar vóru nakrir verri sadistar. Og tað elska tey kristnu at válka sær í. Rómverjar høvdu helst ikki brúkt giljutinuna, um teir høvdu uppfunnið hana. So høvdu teir í øllum førum krossfest offrið fyrst og giljutinera aftaná. Og lesarin kann sjálvur síggja fyri sær ein upprisnan Kristus við høvdinum undir arminum. Ella  hevur hann sett høvdið á pláss aftur, sum um einki var hent? Helst.

onsdag den 24. april 2013

LÝSING




henda yrkingin
bíðar eftir
at onkur sum
ikki er alt
ov friðarligur
men ikki heldur
alt ov nógvan gang
skal seta búgv í sær
viðkomandi
má vera myrkaræddur
og ikki tola
meir enn eitt vist
av ljósi
og eisini duga væl
at fáast við bókstavir
sum ikki sjálvir duga
at seta seg uppá pláss
tað er ein fyrimunur
at skilja tungutalu
og eitt sindur av mjørkatosi
og at vera kvinna 
við stórum bróstum
sum eisini duga
at skriva yrkingar
úr ongum ættum
men hetta er ikki eitt krav
bara ein ynskidreymur
uppi yvir einum glasi av mjólk







.

onsdag den 10. april 2013

FLUGUTAL




í dag havi eg ikki
hugsað um deyðan
heldur ikki í gjár
men fyrradagin
taldi eg tær deyðu flugurnar
sum hava ligið í vindeyganum
síðani seinasta heyst

og meðan eg taldi tær
kom lív í eina teirra
og hon fór stetlandi
upp eftir rútinum
so eg gavst at telja hini líkini
og tá datt hon niður aftur á karmin
lá og sprellaði eina løtu
og so var hon aftur deyð

hetta fekk meg at gruna yvir
um flugur trúgva á eitt lív aftaná deyðan
ella um tær trúgva á talspeki
ella um tað er rætt at telja flugulík
ein slíkan vakran dag í apríl
tá bara tað livandi 
hevur rætt til at liva









.

søndag den 31. marts 2013

TRIÐJA DAGIN




tá eg vakni
hoyri eg maðkarnar tosa um:
hvussu eg smakki:
ein sigur at eg smakki púrasta meiningsleyst
annar sum vil spýggja sigur
at tað er einki høpi í samansetingini
at tað hevði verið betur
um eg var stoktur ella kanska kókaður
ein triði meinar
at hetta minnir mest um sjeynda ættarlið
frá eini útvatnaðari kvæðakempu
ein fjórði heldur hetta vera heldur herskið
at eg smakki sum um samfelagið 
fyrr hevur verið í mær
og tað er heldur ikki líkt til
at eg havi havt nakra virðing fyri tí
ein fimti hevur als ongan matarlyst
tí at tað smakkar sum um boðskapurin
er burturvilstur í brendum barndómi
og einum longsli eftir einum longri lívi
hetta síðsta rørir meg als ikki
men tá onkur sigur
at eg smakki næstan sum kvaldur kærleiki
gravi eg meg sjálvan upp
pilki maðkarnar úr mær
og geri ein nýggjan rætt


úr: Steðgir 1986

søndag den 24. marts 2013

EIN VANLIGUR DAGUR




veðurtíðindini
lovaðu sól og stilli
men vit fingu vátakava
og hvassan vind úr eystri


eg sat til fánýtis
og bíðaði eftir
snikkaranum
sum skuldi koma
og umvæla úthurðina


dómadagurin
sum prædikantarnir prædikaðu
skuldi verða í dag
varð eisini av ongum


hakkibúffurin
eg át til nátturða
og sum sambært slaktaran
var av neytakjøti
smakkaði av svíni


í nátt droymdi eg
at ein ung og eiggilig kvinna
royndi at forføra meg
men eg bar meg undan 
tí eg helt meg vera ov gamlan


sjálvt dreymarnir
lúgva fyri mær























-

UMVENDUR ELLA VIÐVENDUR?



Bispur hevur lagt av at brúka orðið "jaligt" í andaktsinnleggi sínum á Vovvapissitalinum. Helt sjálvur at hann mátti vera nakað ringur av abstinensum, eftir at hann seinast brúkti hetta yndisorðið bara einaferð. Í dag hevur hann fullkomiliga hálsað um. Hann brúkar orðið "neiligt" tvær ferðir! Guð viti, hvat er við at henda í føroysku fólkakirkjuni!

torsdag den 21. marts 2013

LÍTIL MIÐVÍSA




í køkinum varð
fiskurin skoðaður
av teimum sum
heldur vildu eta kjøt

tey hildu at hann hevði
so syrgilig eygu
at tey eins væl
kundu eta ein gravarsálm
sum at eta
eitt so sorgarfult lík

og so setti ein seg við urguna
og pumpaði ein sálm
sum bleiv smaskaður og smaksaður
og fiskurin koyrdur í skrell

og trúgvin kundi 
framhaldandi 
liva víðari
við ongum lukti 
ella anga










-