BÓKADAGAR

 

 

                                                            bókaklikudagar

                                                            klikubókadagar

                                                            klókabiksdagar

                                                            krókamikudagar

                                                            dagbókaklikudagar

                                                            bakbókaklakadagar

                                                            bakklókirklikkaðirdagar

                                                            bókabikíbuksunumdagar

                                                            bókakulkidagar

                                                            bókakrukkuhalgidagar

                                                            brókaleysirbókaskulkidagar 

                                                            bókaleysirdukkukrukkudagar

                                                            bókabrilludilludulludelludagar

                                                            bókaklikudagbótadagar

                                                            krókídintilsklókardagar

                                                            vikuklikuskiftisbókadagar

                                                            skiftisvikubólkadagar

                                                            bókaklintribeklidagar

                                                            klingrubóladagar

                                                            lókutirklinkudagar

                                                            bókablinkandidagar

                                                            bókasnaddusmikridagar

                                                            jólaklinkublinkudagar

                                                            klikulókutirdagar

                                                            klinkuvinkubókadagar

                                                            bókalókutirdagar

                                                            kókibókakringludagar

                                                            bakibókakókiklikudagar

                                                             

 

                                                                            *

                                                            

Á V E G I S

 

                                    Kemur í bókahandlarnar tann 16. november.

 

                                    Kanska ein krimiskaldsøga.

 

                                    Kanska ein andalig bók um vekingarrørslurnar                                              sum fekk øll at sovna.

 

                                    Kanska okkurt triðja ella fjórða.

 

 

                                                        *

STØÐA; HÓSDAG

 

 

 

 

 

                miðlarar knarra um miðlar

                og tað miðlast tað so um

 

                karmarnir eru alt

                innihaldið einki

 

                hví fanin kemur fanin ikki í tey 

                og hví fara tey ikki út um allar geilar

                og geyla og rópa og rætt og slætt

                fortelja øllum hvat tey kunnu gera

                og meir enn tað til dømis + okkurt nýtt

                og sum øll bíta á eisini sjálvt um

                onkur koppur brotnar

 

                toga heldur originalar

                inn í upptøkuhølini

                enn hesi kopiini

                sum eru allastaðni

     

               eg meini ikki at tey skulu larma sum í frímælt

                har ringt er at hoyra hvat ið verður sagt

                tað ljóðar ofta sum um 10 stk jacob vestergaard

                eru í upptøkuhølinum og rópa í holið hvør á øðrum

                men teir 10 fáa ongan kopp at brotna

                og einki nýtt er at frætta

                frammanundan er ljóðgóðskan ikki góð

                so tú mást spola aftur 10 ferð

                og so móti endanum skal hvør geylari forteljari

                hvat hann skal gera í vikuskiftinum

                tað er heldur ikki áhugavert

                eins og tað er at hesin miðil

                einki leggur út í vikuskiftinum

                so hetta man vera ein frítíðarmiðil

                sum einki tímir í frítíðini

                

                

                (framhald)

                                            *

STØÐA; TÝSDAG

 

 

 

 

 tað hendi ikki so nógv týsdag

andstøðan vildi hava sáttmálan við russar í tingið aftur

tí teir vilja so illa sleppa at stuðla putin og hansara álopskríggi

andstøðuni dámar so væl at nógv ukrainsk børn verða dripin

tað gevur henni eitt slag av religiøsum fulnaði

so kunnu fólk aftur fáa ókeypis fish and chips á sjómannadegnum

og børnini fáa túr við brandbilinum og ikki minst

at tey vaksnu í framtíðini sleppa at royna nýggja skannaran

sum tey ikki høvdu fingið

um tey ikki stuðlaðu hópdrápsmanninum í kreml

og øll eru so glað fyri vatnkríggið á vágni

næstu ferð verður reyður fruktlitur koyrdur í vatnið

so tað líkist ordiligum kríggi akkurát sum tað hjá putin

 

 

STØÐA; MÁNADAG

 

 

 

 

        frystur laksur

        sum segðist vera villur

        helst var tað tí

        at hann var frystur

 

        hann spraklaði ikki

        tá hann varð stoktur

        heldur ikki eftir

        at hann varð etin

        ella tá hann varð

        kukkaður út aftur

 

        og tað er heldur ikki hann

        sum fer at gera 

        fólk arbeiðsleys 

        og milliardingarnar

        til fátækar millióningar

        sum mugu sova

        í frystiboksini

        um teir skulu fáa

        nýggj hugskot

 

        sum til dømis

        at útflyta fryst

        krokodillutár

        til tey heitu

        londini

 

 

            * 

STØÐA; SUNNUDAG

 

 

 

 

 

 

 

 

 

 

 

helt ikki at tað vóru

tær kaffibønirnar eg

helt at tað vóru men

saman við hitaða

rugbollanum fekk eg

ta røttu orkuna at

enn eina ferð

hálova grótinum

at tað skuldi altíð

sleppa at bæði

liggja og standa

har sum tað er

og so kunnu onnur

gera inntriv

í sítt ítriv

á handilsvallaðum

undirlendi 

 

 

 

 

 

 

********************************************************

STØÐA; LEYGARDAG

 

        

 

 

 

            tey harta tey sum harta

                tað gráa gullið men ikki eitt orð

                    um tað gráa silvurið ella ta gráu bronsuna

             ella hvat við tí veruliga gráa:

                                  grótinum!

                                    og øll munnu vita hvønn lit tað hevur

                       sjálvt tann ídnasta forkonan í formanssessinum

        veit hvussu tað sær út ella hvussu tað ikki sær út

     eins væl og hon minnist eitt eyðkennislag

          tey ljóða øll sum telefonmusikkurin ið pínir okkum øll

    meðan vit bíða eftir at telefonin veruliga verður tikin

og muzakkin steðgar og ein fitt ella køld strongd rødd spyr

   hvørjum hon ella hann kann hjálpa tær við

     og tú sigur hvørji ørindini eru og tú verður

       koplaður inn á eina aðra linju

  við tí sama forbannaða eyðkennislagnum

og nú er tað forkonan í formanssessinum

sum verður umstillað fyri triðju ferð

 og enn eina ferð tað sama eyðkennislagið

  tað er eitt sindur í meira lagi og nú merkir hon okkurt

                  sum er bæði hart og vátt

                ja hon kastar burtur   hittir reis

      okkurt reytt kemur út

og eyðkennislagið steðgar og ein rødd spyr automatiskt

hvat kann eg hjálpa tær við og hon svarar at hon hevur

         aborterað ein stein 

               ein reyðan stein

     ja eg havi aborterað royðu rópar hon í telefonina

    og so verður hon umstillað eina ferð enn

   og upp aftur meira av eyðkennislagnum

     kunnu tit senda mær ein sjúkrabil beinan vegin

  eg havi aborterað royðu og tað skal verða ein sjúkrabilur

     við ongum muzakskum eyðkennislagi

        eg orki hetta ikki meir hoyrir tú

            eg eri ikki gráhærd enn og havi aborterað royðu

                 bara tí at tit spæla hatta lortið í telefonini

                                            *

STØÐA; FRÍGGJADAG

 

 

 

 

                                                jarðbotnurin biður meg

                                        biðja hálsin ikki hosta fyrr enn øll

                                    stakløgini hava lagt seg aftur í stakkin og takka

                                           fyri stuðulin til sodavøtnini sum børnini

                                                ikki sloppu at smakka tí at vindurin fyrst

                                                        skuldi roynast sum strúkarar

                                                            so slapst undan at strekkja tey                                                                                     størstu løkini

                                                                    ið ikki skulu ámígast við                                                                                             sólarlitum fyrr enn                                                                                             myrkrið

                                                                                                krevur tað

 

 

 

                                                                                            *

 

STØÐA; MIKUDAG

 

 

 

    stytta alt til

        viðmerkt

                    brennimerki

áðrenn roykurin breiðir seg til miðlar við miðvísari andaneyð 

hart er at leika tupper ware standard tónar sum klíggja klisjur

                                                tá ringt er at fáa tíð hjá oyrnalæknanum

og so fara vit at undirmeta túrin við sjúkrabilinum

            tann sum onga jólagávu fekk breyt beinið sum eykavinning

gipsið kravdi eina øðrvísi heimspeki 

øll í ullintum undirbuksum skuldu kannast fyri vit

meðan tey sum ótu livurposteik skuldu kannast fyri óvit

og her koma trøllini upp í leikin við teirra ræðuligu tølum

sum fáa tey ódeyðuligu at tyggja enn fleiri heilsubollar enn trøllini megna                                                                                                      at telja

og eingin hevur longur ráð at koyra í sjúkrabili eftir klokkan beinagrind

urtagarðsfólkið verður sett til at henta líkini og leggja tey varisliga í                                                                                             serligar hjólbørur

                                                                    sum málráðið enn ikki hevur                                                                                 krotusmíðað orð til

tey sum ikki hava ráð til at búgva í egnum landi eru ikki vælkomin

                                                                            í sínum egna landi

vit skulu miða eftir at fáa rík ferðafólk til landið sum kunnu gera tey ríku                                                                                                         ríkari

meðan landsins reyparar skeina sær uppí skommina teir hildu vera                                                                                                     sannleikan

og skola seg síðan niður meðan teir reksa alt upp teir hava gjørt fyri at                                                                                                     enda so

                                                                                    *

SURR

                                                                             

                                             sannleikin hevur

                                             einki við litir at skaffa

                                             segði hon og hann

                                             er heldur ikki ein

                                             spurningur men eins og

                                             spurningurin hevur

                                             sannleikin skeivt kyn

                                             og tað er orsøkin til

                                             at summi hava ilt

                                             í høvdinum tá tey

                                             vakna á morgni og

                                             kunnu ikki lofta 

                                             alt tað ítøkiliga

                                             í rúminum so vøkan

                                             verður ein stór 

                                             surrandi fluga 

                                             sum bara hoyrist

                                             í tínum egna svari

                                                           *

                                                           *

                                                           *

 

TÍÐINDI

 https://www.instagram.com/reel/CuNHQiOvlWZ/?utm_source=ig_web_button_share_sheet&igshid=MzRlODBiNWFlZA==TÍÐINDI úr: HEIMVITISFERÐIN

HA?

 

 

 

 

 

                                    Hvør eg eri?

                                    Nei, eg eiti ikki Heri.

                                    Hvat eg geri?

                                    Eg eri ikki tann seri.

                                    Nei, har havi eg ikki verið.

                                    Og eg eigi ikki hatta klaverið.

                                    Líkist eg eini brostnari peru?

                                    Jú, eg veit væl, at eg einki hoyritól beri.

                                                            *

SPOLING & SPULING

 

Her stóð ein yrking. Nú er hon burtur. Tað nýggja árið er ikki nýtt. Tað er eins gamalt og tað sonevnda gamla. Eisini um tú lurtar eftir skorputu sendingini um mentanarárið sum fór. Har verða millum aðrar listagreinar ársins fagru bókmentir reksaðar upp. Eingin viðgerð av innihaldi ella meting av dygd. Helst undir umberingini: ov lítið av tíð. Og tað er eisini ov lítið av tíð alt árið í mentanarsendingunum (í Kringvarpinum, sonevnda mentanarstovninum) sum skifta navn annað ella triðja hvørt ár hóast einki broytist til tað betra. Viðhvørt verður onkur tilvildarligur høvundur boðin at svara nøkrum standardspurningum, og fyri at fylla út, verður hann biðin at lesa eitt sindur upp her og har púra ókeypis. Men ummæli ella umrøða av bókum kemur ikki fyri longur. Ein fær næstan hug til at halda, at orsøkin er persónligt agg til bókmentir ella til tey sum skriva bøkur. Men í hesi nýggjárssendingini var ein emeritussa í bókmentum boðin við. Óvist av hvørjari orsøk. Og so ein onnur yngri, helst gamal næmingur emeritussanna, men henda fekk ikki sagt so nógv fyri teirri gomlu. Tá ein sjálvur verður nevndur, so er ringt at lata vera við at viðmerkja okkurt sum sagt verður og er púra burtur við. Har vóru eisini aðrar góðar útgávur ið einki skoðsmál fingu. Og tað ger kanska heldur einki, tá fakkunnleiki mest sum ikki er til staðar. Onkuntíð táttar ein bara brosvøddarnar. Aðrar tíðir brestur ein út at flenna og so er dagurin bjargaður. Ja kanska er sendingin satirisk og so siga tey, at satira manglar í vørpunum! Viðvíkjandi bók mín EINKI HEITI umrøddi emeritussan einans heitið sjálvt. Hon helt, at tá yrkingarnar í bókini høvdu heiti, so kundi tað bara vera kápan á bókini sum æt EINKI HEITI. Á sum eg fór at flenna og fekk sjálvandi eisini ringa samvitsku aftaná, tí eg tók í veruleikanum synd í emeritussuni. Men fór so at ivast, tí tað er bæði synd og skomm at lata hesa tussu sleppa framat alla staðni við síni óvitan. Eisini tá hon svaraði, eftir at verið spurd um, hvat hon helst um farana yrkingarárið, ja so svaraði hon at tað var gott, at tað bleiv yrkt um sjúkur. Sum um tað er nakað nýtt. Sjálvur gav eg í 2000 savnið Blóðroyndir sum var skrivað á einum sjúkrahúsi í Rom. Í 2004 gav eg út savnið Eygnamørk sum var skrivað á sjúkrahúsi í Hvidovre, ja tað man vera ringt at ikki skriva um sjúku tá ein er innlagdur á sjúkrahúsi. Og áðrenn tað man eisini onkur annar hava skrivað um sjúkur - tuberklarnir vóru jú ikki nakað forkølilsi. Annars er tað ikki tekin um dygd, at ein yrkir um tað eina ella um hitt. Tú kanst eins væl skriva eitt lesarabræv um evnið, um tú ikki dugir at geva tí poetiskt flog og dýpd. Skuldina at ein slík evnaleys emeritussa sleppur í sonevnda mentanarsending hevur sjálvandi ritstjórin sum eftir øllum at døma ikki kennir mun á havragrýni og gullkorni. Og eg rokni als ikki við, at nøkur vón um bata er í nýggja árinum hjá hesum mentanarstovninum á mentanarliga og listaliga hermótinum. Gævi at eg fór skeivur - og tað kostar einki at vóna.

 

 

 

 

 

*

NÝGGJÁRSMORGUN

 

 

 

 haldi ikki nýggjár

vinir eru sum lundi

nýggjársmorgun 

um hesar leiðir

 

plagi heldur ikki

at minnast farna árið

meiri enn ein einstakan 

dag ella minutt 

tann 28. januar fór

eg við bussinum til

eina læknaviðtalu

á sjúkrahúsi

júst tá eg skal

reisa meg og

fara úr bussinum

fekk eg blettir

fyri eygunum

og alt gránar

eg hómi einans okkurt

framman fyri mær

havi so ofta gingið

somu leið at eg veit

hvar eg við hondunum

kann trilva meg fram við

veggjunum og inn

gjøgnum dyrnar á deildini

og beint yvir til móttøkuna

og mest sum heingi meg

niður á diskin og sigi við

hana sum situr har at eg

havi tíð klokkan 11 hjá

lækna mínum og eg havi tað

av helviti til og hon sigur

at eg eri líkbleikur og biður 

meg seta meg niður á sofuna

og tað geri eg ikki men

leggi meg á hana og svími

og komi fyri meg aftur tá

læknin fær meg upp á føtur

aftur og inn á eina stovu

har eg verið kannaður og 

alt tykist at vera í lagi og eg 

spyrji um eg kann vera eitraður

og tá spyr læknin hvør skuldi 

eitra teg og eg svari spyrjandi

putin og tá fara bæði læknin og

sjúkrasystirin at flenna og siga við

einum munni at tað er ikki humoristiski 

sansurin sum er sjúkur og tá

varnist eg at blettirnir á eygunum

eru so smátt við at hvørva og eg kann 

fara inn til viðtaluna eg var á veg til

 

*